ರುಚಿ ರುಚಿಯಾದ ಕಲ್ಚರಲ್ ಕರ್ರಿ!


ಜೂನ್ 2 ರಿಂದ ಜೂನ್ 14 ರವರೆಗೆ ಕರ್ನಾಟಕದ ನಾನಾ ಭಾಗಗಳ, ಬಾಯಲ್ಲಿ ನೀರೂರಿಸುವ ಬಗೆ ಬಗೆಯ ತಿಂಡಿ, ತಿನಿಸು ಊಟಗಳ ಹಬ್ಬವೊಂದು ಬೆಂಗಳೂರಿನ ಚಾನ್ಸರಿ ಹೋಟೆಲ್ ನಲ್ಲಿ ನಡದಿರೋ ಸುದ್ದಿ ಬಂದಿದೆ ಗುರು. "ಕರ್ನಾಟಕ ಫೆಸ್ಟಿವಲ್ - ಎ ಕಲ್ಚರಲ್ ಕರ್ರಿ" (Karnataka Festival - A Cultural curry) ಅನ್ನೋ ಹೆಸರಿನ ಈ ವಿಶೇಷ ಕಾರ್ಯಕ್ರಮದ ಮೂಲಕ ಕರ್ನಾಟಕದ ಶ್ರೀಮಂತ ಕಲೆ, ಸಂಸ್ಕೃತಿ, ಪರಂಪರೆಯನ್ನು ಹೆಚ್ಚೆಚ್ಚು ಜನರಿಗೆ ತಲುಪಿಸೋದು ಸಂಘಟಕರ ಉದ್ದೇಶ ಆಗಿದ್ದು, ಅದಕ್ಕೆ ಸಕತ್ ಪ್ರತಿಕ್ರಿಯೆ ಕೂಡಾ ಸಿಕ್ಕಿದೆಯಂತೆ. ಇದು ನಿಜಕ್ಕೂ ಸಕತ್ ಒಳ್ಳೆಯ ಬೆಳವಣಿಗೆ ಗುರು.
ಊಟ-ತಿಂಡಿಗೆ ರುಚಿ ಜೊತೆ ಇತಿಹಾಸವೂ ಇದೆ!
ನಮ್ಮ ಕಲೆ, ಸಂಸ್ಕೃತಿ, ಪರಂಪರೆಯಷ್ಟೇ ವೈವಿಧ್ಯತೆ, ಇತಿಹಾಸ ನಮ್ಮ ನಾಡಿನ ಆಹಾರಕ್ಕೂ ಇದೆ. ನಮ್ಮ ಆಹಾರ ಪದ್ಧತಿ ನಮ್ಮ ಸಂಸ್ಕೃತಿಯ ಒಂದು ಭಾಗವೂ ಹೌದು. ರಾಗಿ ಮುದ್ದೆ, ಸೊಪ್ಪಿನ ಸಾರು, ಜೋಳದ ರೊಟ್ಟಿ, ಎಣಗಾಯಿ ಪಲ್ಲ್ಯ, ಗುರೆಳ್ಳು ಚಟ್ನಿ, ಪುಳಿಯೋಗರೆ, ಬಿಸಿಬೇಳೆ ಬಾತ್, ಅಂಬೋಡೆ, ಮೈಸೂರು ಪಾಕ್, ಧಾರವಾಡ ಪೇಡೆ, ಕರಾವಳಿಯ ಅದ್ಭುತವಾದ ಮೀನಿನ ಅಡುಗೆ, ಹೀಗೆ ಉತ್ತರದ ಬೀದರಿನಿಂದ ಹಿಡಿದು, ದಕ್ಷಿಣದ ಮೈಸೂರಿನವರೆಗೂ ನಮ್ಮಲ್ಲಿ ವಿಧ ವಿಧವಾದ ರುಚಿಕರ ತಿಂಡಿ-ತಿನಿಸುಗಳು, ಆಹಾರ ಪದ್ಧತಿಗಳಿವೆಯಲ್ಲಾ, ಇವನ್ನೆಲ್ಲ ನಮ್ಮ ಹೋಟೆಲ್ ಉದ್ಯಮಿಗಳು ಅವರ ಮೆನುನಲ್ಲಿ ಹಾಕಬೇಕು, ಸರಿಯಾದ ಪ್ರಚಾರ ತಂತ್ರ ಬಳಸಿ ಕರ್ನಾಟಕ ಅಡುಗೆ ಅನ್ನುವುದನ್ನೇ ಒಂದು ದೊಡ್ಡ ಬ್ರಾಂಡ್ ಆಗಿಸಬೇಕು ಮತ್ತು ಇದರಿಂದ ದೊಡ್ಡ ಮಟ್ಟದಲ್ಲಿ ಲಾಭ ಮಾಡ್ಕೋಬೇಕು. ಒಟ್ಟಾರೆ ಕರ್ನಾಟಕದ ಅಡುಗೇನೂ ಕರ್ನಾಟಕ ಪ್ರವಾಸೋದ್ಯಮದ ಒಂದು ಪ್ರಮುಖ ಆಕರ್ಷಣೆ ಆಗ್ಬೇಕು ಗುರು.
ನಮ್ಮದು ಕೆಲವು ಜವಾಬ್ದಾರಿ ಇದೆ...
ನಾವೂ ಅಷ್ಟೆ! ಕನ್ನಡೇತರರ ಜೊತೆ ಹೊರಗೆ ಊಟಕ್ಕೆ ಹೋದಾಗ ನಮ್ಮ ಆಹಾರಗಳನ್ನ ಅವರಿಗೆ ಪರಿಚಯಿಸೋ ಜವಾಬ್ದಾರಿ ತಗೋಬೇಕು. ನಮ್ಮ ಕನ್ನಡದ ಆಹಾರಕ್ಕೆ ಆದ್ಯತೆ ಕೊಡ್ಬೇಕು. ನಮ್ಮ ನಮ್ಮ ಕಛೇರಿಗಳಲ್ಲಿ ನಡೆಯುವ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಊಟಕ್ಕೆ ಕರ್ನಾಟಕದ ಅಡುಗೆಯನ್ನು ಎಲ್ಲರಿಗೂ ಪರಿಚಯಿಸುವ ಕೆಲಸ ಮಾಡಬೇಕು. ಕರ್ನಾಟಕದ ಊಟ ಉಪಹಾರದ ಬಗ್ಗೆ ನಡೆಯುವ ಮೇಳಗಳಿಗೆ ನಿಮ್ಮ ಕನ್ನಡೇತರ ಸ್ನೇಹಿತರನ್ನು ತಪ್ಪದೇ ಕರೆದುಕೊಂಡು ಹೋಗ್ಬೇಕು. ಕರ್ನಾಟಕದ ಆಹಾರ, ವೈವಿಧ್ಯತೆಯಲ್ಲಿ ಸಂಪದ್ಭರಿತ ಅನ್ನೋದನ್ನ ತೋರಿಸಿಕೊಡಬೇಕು. ಏನಂತೀಯ ಗುರು ?

1 ಅನಿಸಿಕೆ:

Anonymous ಅಂತಾರೆ...

This event was not at all publicised in media.We came to know only on the last day that such a event was going on.
Kannadigas lack marketing skills.We should accept that and be agressive in marketing our products and these kind of events.

ನಿಮ್ಮ ಅನಿಸಿಕೆ ಬರೆಯಿರಿ

"Anonymous" ಆಗಬೇಡಿ, ಯಾವುದಾದರೂ ಒಂದು ಹೆಸರಿಟ್ಟುಕೊಂಡು ಸೋಮಾರಿತನವನ್ನು ಎದುರಿಸಿ!

Related Posts with Thumbnails