ಕನ್ನಡಿಗರಿಗೆ ಹಿಂದಿ ಜಾಹೀರಾತು ಯಾಕೆ ಮಣ್ಣು ಹುಯ್ಕೊಳಕ್ಕೆ?

ಬೆಂಗಳೂರಿನ ಜನ ಯಾರು, ಎಂಥೋರು, ಅವರಿಗೆ ಬೇಕಾಗಿರೋದು ಯಾವ ಭಾಷೆ ಹಾಡುಗಳು ಅಂತ ಅರ್ಥ ಮಾಡಿಕೊಳ್ಳದೆ ಮೊದ್ಲು ಬರೀ ಹಿಂದೀಮಯವಾಗಿದ್ದ ರೇಡಿಯೋ ಮಿರ್ಚಿ ಈಗ 100% ಕನ್ನಡ ಹಾಡುಗಳನ್ನು ಹಾಕ್ತಾ ಬೆಂಗಳೂರಲ್ಲಿ ಮನೆಮಾತಾಗಿದೆ. ಸ್ಥಳೀಯ ಮಾರುಕಟ್ಟೆಗೆ ಬೇಕಾದ ಕನ್ನಡ ಹಾಡುಗಳ್ನ ಕೊಡೋ ಚಾನೆಲ್ಗೆ ಈ ಒಳ್ಳೇ ಹೆಸ್ರು ಸಿಗೋದ್ರಲ್ಲಿ ವಿಶೇಷವೇನಿಲ್ಲ.

ಆದ್ರೆ ಅದೇ ರೇಡಿಯೋ ಮಿರ್ಚಿ ಕೇಸರಿಬಾತಲ್ಲಿ ಸಿಗೋ ಕೂದ್ಲು ಥರಾ ಬೇಡಾಂದ್ರೂ ಕನ್ನಡ ಹಾಡುಗಳ ನಡುವೆ ಹಿಂದಿಯಲ್ಲಿ ಜಾಹೀರಾತುಗಳ್ನ ಕನ್ನಡದ ಕೇಳುಗಂಗೆ ಕೇಳಿಸುತ್ತಿದೆಯಲ್ಲ ಗುರು? ಇದರಿಂದ ಕೇಳುಗ-ಕೇಳಿಸುಗಗಳಿಬ್ಬರಿಗೂ ಕಷ್ಟ, ನಷ್ಟ! ಜಾಹೀರಾತು ಕೊಡೋರಿಗೂ ಕೇಳೋರಿಗೂ ಕನ್ನಡದಲ್ಲೇ ಜಾಹೀರಾತು ಯಾಕಿರಬೇಕು ಅನ್ನೋದನ್ನ ಸ್ಪಷ್ಟ ಮಾಡಕ್ಕೆ ಈ ಬರಹ.

ಒಂದು ಜಾಹೀರಾತಿನ ಉದ್ದೇಶವಾದರೂ ಏನು?

ಇವತ್ತಿನ ದಿನ ಕನ್ನಡದ ಎಫ್.ಎಂ. ಚಾನೆಲುಗಳಲ್ಲಿ - ಅದೂ ರೇಡಿಯೋ ಮಿರ್ಚಿಯಲ್ಲಿ - ಹಿಂದಿ ಜಾಹೀರಾತುಗಳು ಬರುತ್ತಿರೋದು ನೋಡಿದರೆ ಆಯಾ ಕಂಪನಿಯ ಜನರಿಗೆ ಜಾಹೀರಾತು ಅಂದ್ರೆ ಏನೂಂತಾನೇ ಮರೆತುಹೋಗಿದೆಯೇನೋ ಅನ್ನಿಸುತ್ತೆ ಗುರು! ಆದ್ದರಿಂದ ನೆನಪಿಸಿ ಕೊಡೋಣ:

• ಜಾಹೀರಾತು ಬಿತ್ತರವಾಗುವ ಕ್ಷೇತ್ರದಲ್ಲಿ ಆದಷ್ಟೂ ಮಾರುಕಟ್ಟೆಯನ್ನು ಮುಟ್ಟಬೇಕು
  
• ಜಾಹೀರಾತು ಯಾರಿಗೋಸ್ಕರ ಮಾಡಿದೆಯೋ ಅವರ ಮನಕ್ಕೆ ನೇರವಾಗಿ ನಾಟಬೇಕು
  

ಹೀಗಿರುವಾಗ 100% ಕನ್ನಡ ಹಾಡುಗಳನ್ನು ಹಾಕ್ತಿರೋ ಎಫ್.ಎಂ. ಚಾನೆಲುಗಳಲ್ಲಿ ನಡುನಡುವೆ ಹಿಂದಿ ಜಾಹೀರಾತುಗಳ್ನ ಹಾಕೋದು ಮೂರ್ಖತನವಲ್ದೆ ಇನ್ನೇನು? ಅರ್ಥವಾಗದ ಭಾಷೆಯಲ್ಲಿ ಸಕ್ಕತ್ ತಲೆ ಉಪಯೋಗಿಸಿ ಏನೇನೋ ಹೇಳಿದರೆ ಯಾವ ಮಣ್ಣು ಉಪಯೋಗ?

ಜಾಹೀರಾತು ಕನ್ನಡದಲ್ಲಿ ಇದ್ರೇನೇ ಹೆಚ್ಚು ಪರಿಣಾಮಕಾರಿ

ಜಾಹೀರಾತುಗಳ್ನ ಕನ್ನಡದಲ್ಲೇ ಮಾಡೋದ್ರಿಂದ ಬರೀ ಲಾಭಾನೇ ಇರೋದು. ನಷ್ಟ ಅನ್ನೋದಿಲ್ಲ. ಏನು ಲಾಭ? ಮೊದಲ್ನೇದಾಗಿ ಮೇಲೆ ಹೇಳಿರೋ ಯಾವುದೇ ಜಾಹೀರಾತಿನ ಮೂಲ ಉದ್ದೇಶಗಳೆರಡೂ ಜಾಹೀರಾತುದಾರ ಈಡೇರಿಸಿದಂಗಾಗತ್ತೆ. ಅಂದರೆ - ಆದಷ್ಟೂ ಹೆಚ್ಚು ಗ್ರಾಹಕರನ್ನು ಮುಟ್ಟಬಹುದು, ಜೊತೆಗೆ ಗ್ರಾಹಕರಿಗೆ ಆದಷ್ಟೂ ಪರಿಣಾಮಕಾರಿಯಾಗಿ ತಂತಮ್ಮ ವಸ್ತು/ಸೇವೆಯನ್ನು ಮಾರಾಟ ಮಾಡಬಹುದು. ಇದೇ ತಾನೆ ಬೇಕಾಗಿರೋದು? ಕನ್ನಡದಲ್ಲೇ ಜಾಹೀರಾತುಗಳಿದ್ದರೆ ಕೇಳುಗರು ತಂತಮ್ಮಲ್ಲೇ ಅದೇ ಜಾಹೀರಾತಿನ ಬಗ್ಗೆ ಮಾತಾಡಿಕೊಳ್ತಾರೆ, ಅದರಿಂದ ಜಾಹೀರಾತು ಕೊಡುತ್ತಿರುವ ಕಂಪನಿಗೆ ಮತ್ತಷ್ಟು ಲಾಭ.

ಅಲ್ಲದೆ ಕನ್ನಡಿಗರ ಮನಕ್ಕೆ ನಾಟುವಂಥಾ ಜಾಹೀರಾತುಗಳನ್ನು ತಯಾರಿಸೋದಕ್ಕೆ ದಿಲ್ಲಿಯಿಂದ ಹಿಂದಿ ಜನರನ್ನ ಕರ್ಕೊಂಡು ಬಂದ್ರೆ ಅವರೇನು ಕಿಸ್ದಾರು ಬೆಂಗಳೂರಲ್ಲಿ? ಅವರಿಗೇನು ಗೊತ್ತು ಇಲ್ಲೀ ಮನೆಮಾತು? ಅವರಿಗೇನು ಗೊತ್ತು ಇಲ್ಲೀ ಮಾತಿನ ಸೊಗಡು? ಅವರೇನು ಮುಟ್ಟಾರು ಕನ್ನಡಿಗನ ಮನಸನ್ನು, ಅವರ ತಲೆ?

ಹೇಗೇ ತಿರುಗಿಸಿ ಮುರುಗಿಸಿ ನೋಡಿದರೂ ನಮ್ಮ ಜಾಹೀರಾತುಗಳು ಕನ್ನಡದಲ್ಲೇ ಇರಬೇಕು ಅನ್ನೋದು ಸ್ಪಷ್ಟ. ಇದೇನು ಚಿಪಣಿ-ತಂತ್ರಜ್ಞಾನವಲ್ಲ. ಇದನ್ನ ಜಾಹೀರಾತು ಕೊಡ್ತಿರೋ ಕಂಪನಿಗಳು ಮತ್ತು ಮಿರ್ಚಿ ಥರಾ ಎಫ್.ಎಂ. ವಾಹಿನಿಗಳು ಅರ್ಥ ಮಾಡ್ಕೊಂಡ್ರೆ ಅವರಿಗೇ ಲಾಭ ಗುರು!

ಹಿಂದಿ ಜಾಹೀರಾತುಗಳು ಹಿಂದಿ ಹೇರಿಕೆಯ ಪ್ರಭಾವವೇ

ಈ ಚಾನೆಲ್ಗಳಲ್ಲಿ ಜಾಹೀರಾತು ಹಾಕೋ ಕಂಪನಿಗಳಲ್ಲಿ ಹಲವು ಕಂಪನಿಗಳು ಕನ್ನಡೇತರರದಾಗಿವೆ ಇಲ್ಲಾ ಹೊರರಾಜ್ಯದ ಕಂಪನಿಗಳಾಗಿವೆ ಅನ್ನೋದು ಕಟುಸತ್ಯ. ಅವರಿಗೆಲ್ಲ ಹಿಂದೀನೇ ರಾಷ್ಟ್ರಭಾಷೆ ಅನ್ನೋ ಸುಳ್ಳನ್ನು ತಾನೆ ನಮ್ಮ ಕೇಂದ್ರದೋರು ಹೇಳಿಕೊಟ್ಟಿರೋದು (ಈ "ವಿದ್ಯೆ"ಯನ್ನ ವಿಶ್ವಸಂಸ್ಥೆಯ ಸೆಕ್ರೆಟರಿ ಜನರಲ್ ವರೆಗೂ ತಲುಪಿಸಿದ್ದಾರೆ)? ಆದ್ದರಿಂದ ಕರ್ನಾಟಕಕ್ಕೆ ವ್ಯಾಪಾರಕ್ಕೆ ಬಂದಿರೋ ಹೊರಗಿನೋರು ಅನ್ಕೊಂಡಿರ್ತಾರೆ ಇಡೀ ಭಾರತದಲ್ಲಿ ಹಿಂದಿ ಇಲ್ಲಾ "ಓಡತ್ತೆ", ಇಲ್ಲಾ "ಕಾನೂನಿನ ಪ್ರಕಾರ ಓಡಲೇಬೇಕು" ಅಂತ! ಅಂಥಾ ಯಾವ ಕಾನೂನೂ ಇಲ್ಲ, ಇಲ್ಲಿ ಹಿಂದಿ ಓಡೋದೂ ಇಲ್ಲ. ಓಡತ್ತೆ ಇಲ್ಲಾ ಓಡಬೇಕು ಅಂತ ನಂಬ್ಕೊಂಡಿರೋ ಕನ್ನಡಿಗರೂ ಕೆಲವರು ಇದ್ದಾರೆ ಗುರು! ಅವರಿಗೆ ಸ್ವಲ್ಪ ಬುದ್ಧಿ ಹೇಳಿ!

ಕನ್ನಡಿಗರ ತಟ್ಟೇಲಿ ಹಿಂದಿ ಬಡಿಸೋದು ಪೆದ್ದತನ ಅಂತ ಹಾಡು ಹಾಕುವಾಗ ಮಿರ್ಚಿಗೆ ಅರ್ಥವಾಗಿದೆ. ನಿಧಾನವಾಗಿ ಜಾಹೀರಾತು ಹಾಕುವಾಗಲೂ ಅರ್ಥವಾಗತ್ತೆ, ಜಾಹೀರಾತು ಹಾಕಿಸೋ ಕಂಪನಿಗಳಿಗೂ ಅರ್ಥವಾಗತ್ತೆ. ಅರ್ಥವಾಗದೇ ಹೋದರೆ ಸ್ವಲ್ಪ ಬುದ್ಧಿ ಹೇಳಿ ಮಾಡಿಸಬೇಕು, ಅಷ್ಟೆ. ಯಾವನಿಗಾಗತ್ತೆ ಬರೀ ಹಿಂದಿ-ಕೂದಲು ತುಂಬಿರೋ ಕೇಸರಿಭಾತು ತಿನ್ನಕ್ಕೆ? ಥೂ! ಛೀ!