ಅಡಿಗೆ ಸಿಲಿಂಡ್ರಿಗೆ ಹತ್ತಿರೋ ಹಿಂದಿ ಕಿಡಿ

"ಭಾರತದ ಸ್ವತಂತ್ರ ಪ್ರಜೆಗಳೇ, ನೀವೆಲ್ಲಾ ಹಿಂದಿಯನ್ನು ನಿಮ್ಮ ಸುರಕ್ಷತೆಗಾಗಿ ಕಲಿಯಿರಿ, ಇಲ್ಲವೇ ಅಪಾಯ ಬರದಂಗೆ, ಏನ್ಮಾಡ್ಬೇಕು ಅಂತ ಬರ್ದಿರೋ ಸೂಚನೆಗಳ್ನ ಓದಕ್ಕಾಗ್ದೆ ನೆಗುದ್ ಬಿದ್ದು ಸಾಯ್ರಿ" ಅಂತಂದ್ರೆ ಎಂಗನ್ಸುತ್ತೆ ಗುರು?

ಈಗ... ಒಸಿ ನೋಡು, ಎಂಗದೆ ನಮ್ ಬಾರತದ ಯವಸ್ತೆ ಅಂತ. ಎಲ್ರು ಮನ್ಯಾಗಿರೋ ಅಡ್ಗೆ ಸಿಲಿಂಡ್ರು ಮೇಲಿರೋ ಸೂಚನೆಗಳನ್ನು ಓದಿ ತಿಳ್ಕೊಂಬೇಕು ಅಂದ್ರೆ ಇಲ್ಲಾ ಇಂಗ್ಲಿಸ್ ಬರ್ಬೇಕು, ಇಲ್ಲಾ ಇಂದಿ ಬರ್ಬೇಕು.

ಪರ್ಪಂಚದಾಗೆ ಬೇರೆ ಕಡೆ ಸುರಕ್ಸತೆ ಅನ್ನೋದಕ್ಕೆ ಅದೆಸ್ಟು ಮಹತ್ವ ಕೊಟ್ಟೌರೆ ಅಂದ್ರೆ ಓದು ಬರಾ ಬರ್ದೆ ಇರೋ ಪುಟ್ಟ ಮಗಿ ಕೂಡಾ ಚಿತ್ರ ನೋಡಿ ಅರ್ತ ಮಾಡ್ಕೊಂಡ್ ಬುಡ್ಬೇಕು. ಆದ್ರೆ ಇಲ್ನೋಡಿ, ನಮ್ಮೂರಲ್ಲೇ ನಮ್ಮ ಮನೆಗಳ್ಗೆ ಸರಬರಾಜು ಆಗೋ ಅಡ್ಗೆ ಸಿಲಿಂಡ್ರು ಮೇಲೆ ಚಿತ್ರಾನೂ ಇಲ್ಲಾ.. ಒಂದಕ್ಸರ ಕನ್ನಡಾನೂ ಇಲ್ಲ. ಅಲ್ಲಾ ಈ ದೇಸದಾಗ್ ಇರೋರ್ಗೆಲ್ಲಾ ಇಂದಿ ಬತ್ತದೆ ಅಂತ ಈ ಎಚ್ಪಿ, ಇಂಡೇನು, ಬಾರತ್ತು... ಇವುಕ್ಕೆಲ್ಲಾ ಅದ್ಯಾವ ಬಡ್ಡೇದ ಏಳವ್ನೆ ಗುರು?

"ಕರ್ನಾಟಕ್ದಾಗೆ ಇಂದೀ ಗಿಂದೀ ಏರಿಕೆ ನಡೀತಿಲ್ಲ, ಎಲ್ಲಾ ಕನ್ನಡದ ಐಕ್ಳು ಅವಾಗವೇ ಕಲೀತಿವೆ" ಅನ್ನೋ ಬುದ್ವಂತ್ರು ಇದಕ್ಕೇನಂತಾರೋ? "ಕನ್ನಡದ ಮಂದಿ ಇಂದೀ ಕಲ್ತುಕೊಳ್ಮ ಅಂತ, ದಿಲ್ಲಿ ದೊರೆಗಳ್ಗೆ ಉದ್ದುದ್ದಕ್ ಅಡ್ಬಿದ್ದು, ಇಂಗೇ ಸಿಲಿಂಡ್ರು ಮ್ಯಾಗೆಲ್ಲಾ ಒಸಿ ಇಂದಿ ಅಕ್ಸರ ಬರ್ಕೊಡಿ, ಕಲ್ತ್ ಕ್ಯಂತೀವಿ" ಅಂತ ಬ್ಯಾಡ್ಕಂಡವ್ರೆ ಅನ್ಬೋದೋ ಏನೋ!